Wia dis foto come from, Getty Images/Nigeria Presidency/Chinese Embassy in Nigeria
China don kick against US threats of sanctions or military actions against Nigeria on top allegations of Christian genocide for di kontri.
Di Chinese govment announce dia position wen dia Foreign Ministry tok-tok pesin Mao Ning address one press conference for Beijing on Tuesday, 4 November.
Di press conference dey come afta US President Donald Trump on 31 October declare Nigeria as a “country of particular concern” sake of allegations say Christian communities dey threatened.
Di Chinese govment declare dia support for Nigeria govment and say dem dey against any kontri wey dey chook mouth for oda countries mata under di disguise of religion and human rights.
“As a comprehensive strategic partner of Nigeria, China firmly support di Nigerian govment in leading its people to a development path wey fit Nigeria national reality.
“We oppose any country interference for oda countries’ internal affairs under di pretext of religion and human rights. We oppose di wanton threat of sanction and use of force.” China tok-tok pesin Mao Ning tok.
Dis article contain content wey X provide. We ask for una permission before anytin dey loaded, as dem fit dey use cookies and oda technologies. You fit wan read di X cookie policy and privacy policy before accepting. To view dis content choose ‘accept and continue’.
Warning: Di BBC no dey responsible for di content of external sites.
End of X post
US Congressman reply China
Meanwhile US Congressman Riley M. Moore wey dey represent West Virginia Second District for di U.S. House of Representatives wey dey part of dos wey blow di mata reply China say, dem no go dictate US foreign policy to dem.
E add say, “Communist autocracy wey recently arrest 30 Christian pastors for dia faith and throw ethnic minorities for concentration camps no go lecture dem.
President Trump dey absolutely right to defend our brothers and sisters in Christ wey dey suffer horrific persecution, and even martyrdom, for dia faith in our Lord and Savior Jesus Christ.” Oga Moore write for one post on X.
Ecowas reject claims against Christian genocide for Nigeria
In di same vein, di Economic Commission of West African States (Ecowas) don reject di claims say Christian genocide dey for Nigeria.
For one statement wey di body release on Tuesday, Ecowas say di claims say terrorists groups dey target one group or di claim say genocide of one religious groups dey for di region na false and dangerous claim.
Dem alert international communities to di growing level of violence wey terrorist groups of different coloration don carry out for some countries for di West African region, including Nigeria.
“Perpetrators of dis violence dey target innocent civilians of all religious denominations including Muslims, Christians, and pipo of oda religions. As independent reports don confam ova di years say, terrorist-related violence no dey discriminate on di basis of gender, religion, ethnicity or age.”
Dem call on di United Nations and all partners to support Member States in dia fight against these groups and to treat as false any claims wey say these terrorists’ groups dey target one group.
E say dis na sake of how dem dey kpai ‘thousands of Christians’ for di kontri.
Trump tok dis one for post wey e make for im Truth Social on Friday, wia e add say Christians for Nigeria dey face threat.
“Christianity dey face existential threat for Nigeria. Dem dey kill thousands of Christians. Radical Islamists dey responsible for dis mass slaughter.”
“I dey hereby make Nigeria a ‘country of particular concern’ – but dat na di least of am.”
Di US president say im don direct im congress pipo to look into di mata and make dem report back to am as dem no fit stand dey look dis kain ‘attrocities’ dey happun for Nigeria.
“Wen Christians, or any such group dey slaughtered lik e dey happun for Nigeria, sometin get to be done.”
“I dey ask Congressman Riley Moore, togeda wit Chairman Tom Cole and di House Appropriation Committee, to immediately look into dis mata, and report back to me.”
Also, for one post on im Truth Social platform on Saturday, Trump tok say im don ask Pentagon to map out possible plan of attack in Nigeria, one day one day afta e warn say Christianity dey “face ogbonge threat” for di West African nation.
On Sunday, President Trump repeat im threat of possible military operations for Nigeria on top di alleged killings of Christians.
Trump no tok about di exact killings e dey refer to but claims of genocide against Nigeria Christians don dey circulate in recent weeks and months for some right-wing US circles.
Groups wey dey monitor violence say evidence wey suggest say dem dey kill Christians pass Muslims no dey for Nigeria, country wey get plenty followers for di two religions.
Nigeria President Bola Tinubu don insist say religious tolerance dey di country and say di security challenges dey affect pipo “across faiths and regions”.
Nigeria don get religious and ethnic tensions for long, particularly for di northeast, wia Islamist groups like di Boko Haram and Islamic State West Africa Province don carry out deadly attacks pass 10 years.
For di North central states of Plateau and Benue, hundreds of pipo don die, sake off armers and herders clashes.
Wetin be genocide?
Na one Jewish-Polish lawyer Raphael Lemkin coin di word for 1943, e combine Greek word “genos” (race or tribe) wit di Latin word “cide” (to kill).
Afta e witness di horrors of di Holocaust, wia dem kill evri member of im family except im brother.
Dr Lemkin campaign to make sure say dem recognise genocide as a crime under international law.
Im efforts lead to di adoption of di United Nations Genocide Convention for December 1948, wey come into force in January 1951. As at 2022, 153 countries don accept am.
Article Two of di convention define genocide as “any of di following acts committed wit di intent to destroy, in whole or in part, national, ethnic, racial, or religious group, such as”:
- Kill members of di group
- Cause serious bodily or mental harm to members of di group
- Deliberately impose on di group conditions of life calculated to cause physical destruction of di group, in whole or in part
- Impose tins wey go go make di group no born children
- Use force transfer children of di group to anoda group
Di convention also impose general duty on signatory states to “prevent and to punish” genocide.
