張繼聰謝安琪夫妻檔出席親子戲劇體驗活動。(娛樂組攝)
張繼聰與謝安琪(Kay)今日(8日)夫妻檔現身九龍灣，出席親子戲劇體驗場活動，兩人分享教養子女的心得，不過剛中學畢業的大仔張瞻與同學往上海畢業旅行，幼女張靖就要參與舞蹈表演，一對子女均未有同場。談到下半年工作計劃，除了夫妻檔澳門開騷以及個人巡唱。阿聰預告明年有機會跟「某組合」開talk show，問到是否「朱凌凌」，他就笑而不語。阿Kay新歌《50/50》獲黃子華MV擔任男主角，她表示會親自下廚請子華神食飯：「約緊佢，等佢冇咁忙想邀請佢嚟我屋企，親自煮畀佢食。」
不再攬頭攬頸
兩人在活動上分享與子女相處之道，阿聰自言跟兒子由朋友交談漸變「man’s talk」，雖然兒子14歲後，兩父子已較少攬頭攬頸，但父子情深厚，不時仍會一起打籃球。他分享兒子為自己落淚的深刻情景，有次他椎間盤突出劇痛，於是叫兒子陪伴駕車出外買藥，「因為腰好痛，要伸直身來揸車，嗰時個仔16、17歲左右，佢喺架車度係咁喊。」他自言起初不明白，但其實這也代表兒子的關愛。Kay則表示負責攬攬和讚賞子女。
Kay不捨兒子澳洲升學
兩人受訪時，談到大仔將前往澳洲升學，Kay自言不捨得，一想起就感觸，故此已找定彼邦好友，方便可經常飛到當地遠距離陪讀書。阿聰笑言大學生最大興趣是「走堂」，已想好計劃應對，「想走堂可以，但我會寄張學費單畀佢，走堂之前計吓一堂幾錢先，再諗吓爸爸返工幾辛苦。」為了讓兒子學懂搵錢辛苦和待人接物之道，阿聰親自出糧聘請大仔做其助理的助理，「跟出跟入等佢感受吓我開工係咩情況，唔可以隨時玩手機，注意做嘢嘅態度同儀表，有啲嘢返學係唔會學到。」
加一蚊人工挖角
獲貼心照顧的阿聰大讚兒子表現合格，雖然試過在工作「癮起」要與阿聰打籃球，但自動自覺，話頭醒尾幫到手。Kay聞言即表態，「我想挖佢過檔，我羨慕爹哋有人幫手遞水攞嘢！」阿聰笑稱：「你可加多一蚊人工，高薪挖角。」問到下周夫妻檔在澳門開騷，大仔可會幫手，兩人就表示已委以重任，由兒子安排屋企人遊覽澳門。
自封「被bully界KOL」
一對小女作為「星二代」，難免因「知名度」受同學欺凌，阿聰坦言，早前在社交平台po了一家四口的跳舞片，令兒子被同學cap圖取笑，「爸爸媽媽做演員，可能有人無謂地崇拜你，也有人無原因又唔鐘意你。我個仔由細到大都承受，但都話我哋鍾意po就po，其實佢自己願承受。所以我同老婆都會事前問清楚先share。」他笑言自己是「被bully界KOL」，「我都係被bully界KOL啦，俾人搞咗幾十年仲生勾勾！其實個女都有呢個情況，我哋都用嬉笑怒罵方式去面對。其實呢個都係好課題嚟，人總會面對啲壞能量，父母保護得幾耐？最好係教識佢哋點面對。」
自認靠老婆
談到下周的夫妻檔澳門開騷，他們透露陸續收到唔少主辦方邀請出騷，但下半年兩人各有各忙，未必可將演出搬返香港，阿聰又自言看透世界：「依家會識enjoy同太太一齊做嘢，後生嗰時有自尊心會避忌。可能依家成熟咗，我真係靠老婆，happy wife，happy life，我應該早十幾年就靠老婆多啲。」他繼續向身邊老婆賣口乖，「你教錯小朋友，仔女唔會有凌厲眼神，但如果老婆咁做（怒睥），你會覺得有道寒氣！我都係抱住謙卑態度學習。3個鐘update一次老婆要求。好多男人係為咗求生先咁做，我係自發性！」
立即更新/下載AM730手機APP 體驗升級功能
